Ang babae ay hindi kaning inihahain
sa mesa ng matrimonya,
Iniluluwa kapag mainit at takot kang mapaso,
sinasabawan ng kape sa umaga
kapag ikaw ay nagkulang,
at itinatapong tutong sa kanyang pagtanda.
Ang babae ay hindi karneng
dinuduro at kinikilo,
ginigisa at laman sa iyong mga pangako,
nilalaga ang buto sa iyong pagsuyo
at ginagawang tsitsaron ang balat
upang maging pulutan.
Ang babae ay hindi halayang
panghimagas sa inyong kalusugan
inuming sa iyong katandaan
o putaheng nilalaspag tuwing may handaan.
May tiyan din siyang kumakalam,
may sikmurang kailangan mapunan
at pusong dapat mahimasmasan.
Kasama mo siyang nagtatanim ng nmaisasaing,
katuwang na naghahanda
ng almusal, tanghalian at hapunan,
kaharap at kasalo sa kinabukasan.
No comments:
Post a Comment